На Словакії в останім часі зліпшує ся аплікація языковых прав у майже каждій области. В смыслі закона може граждан Словакії в комунікації зо самосправов або штатнов справов хосновати в устній і писемній формі язык меншын. В тій справі, о котру намагать ся уповномоченый про народностны меншыны Ласло Буковскый, досягнув ся далшый історічный пункт, як інформує офіціалный сайт його уряду. Од кінця мая зачінать ся з навчаньом державных урядників під назвов Розвиток мадярьско-словацькой і русиньско-словацькой білінґвалной компетенції з адміністратівных жанрів. Наперед буде тото навчаня проходити в мадярьскых окресах Словакії про 59 урядників. Компетенчне навчаня в русиньскім языку про вісем урядників буде проходити в просторах Окресного уряду в Меджілабірцях, што є єдиный офіціалный русиньскый окрес на Словакії, в місяцях септембер і октобер і буде го реалізовати Інштітут русиньского языка і културы Пряшівской універзіты.

(Медвідь)