У віторок 27-го новембра в Братіславі проходило 31-ше засіданя Выбору про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность. За русиньску народностну меншыну брали участь Петро Медвідь – член выбору і Ян Липиньскый – заступник члена выбору, председа Округлого стола Русинів Словеньска. Представителі народностных меншын Были інформованы о новій стратеґії про народностну културу, котру Словакія приготовлює, але і о сітуації односно хоснованя языків народностных меншын ці приготовльованю методікы перепису населіня у 2021-ім році. На засіданя быв запрошеный окрім іншого і директор Фонду на підпору културы народностных меншын Норберт Молнар. Тот познакомив участных, же ку 26-му новембру 2018-го року было підписаных і выплаченых 1319 проєктів із цілковой кількости 1447. 16 жадателів одступило од реалізації проєкту, решта проєктів бы ся мала підписати в найблизшім часі.
(Lem.fm)