Експрезідент Андрей Кіска в понедільок офіціално оголосив заснованя партії, котра буде мати назву Za ľudí. Зробив так на пресконференції в Баньскій Быстріці. В приправнім выборі суть Яна Жітняньска, Юрай Шеліґа, Марія Коликова і Михал Луціак. Кіска представив і далшых співпрацовників зо самосправы ці діпломації. Подля експрезідента треба до політікы дістати способных і честных людей, што є про нього основов. Його партія хоче вычеряти владу партії Smer-SD. Парламентны вольбы будуть за його словами великов вызвов. „Smer-SD є приготовленый владнути з Котлебом, буде приготовленый владнути і з Гарабіном. Не забудьме, же Фіцо вже раз владнув з такыма людми як быв Мечіар ці Слота. Хотять владнути і вшытко зроблять про тото, жебы владли довєдна. І зато є барз важным, жебы сьме справды вшыткы, котры по роках влады єдной партії хочеме зміну і вернути Словакію людям, жебы сьме ся споїли,“ повів експрезідент. За словами Кіскы має його нововыникаюча партія вже 30 тісяч підпорьователів. В слідуючіх днях дістануть пропозіцію стати членами партії.

(Медвідь, TASR)