До далшой вольбы кандідатів на конштітучных судців ся затля нихто не приголосив. Аґентуру TASR о тім інформовав одбор комунікації з медіями і публіков Канцеларії Народной рады Словацькой републікы. Пропозіції на кандідатів мож загнати до 26-го авґуста. Депутаты мають кандідатів на судців волити на слідуючім засіданю, котре зачне 10-го септембра. Буде то вже пята вольба. Парламенту ся дотеперь не подарило выбрати повну кількость бракуючіх кандідатів. Доєдна їх выбрали дотеперь 14, до повной кількости хыбуть штирьоми. Дакілько судців вже выменовав попередній презідент Андрей Кіска, того часу їх є на суді сім із 13-ох. Презідентка Чапутова повіла, же далшых судців выменує, аж кедь дістане повну кількость кандідатів.

(Медвідь, TASR)