Міністерству обороны Словацькой републикы ся неподарило найти правну аналізу дотуляючу ся можности дарованя бомбардерів MiG-29 Україні владов з высловенов недовіров. Выходить то з інформації, котру пресаґентурі TASR дав верейный  охранця прав Роберт Доброводскый. Омбудсман жадать о сприступліня аналізы подля закона о слободнім приступу к інформаціям. За його інформаціями резорт обороны недіспонує таков аналізов, што потверджує днесь і самотне міністерство. Дочасні повірена влада Едуарда Геґера в марці 2023-го року вырішыла, же Україні дарує 13 момбардерів MiG-29 і часть сістему противоздушной обороны Kub. Многы політици і правници твердять, же дочасні повіреный кабінет немав компетенцію даровати міґы, кідже то поважували за важный вопрос загранічной політикы. Втодійшній міністер обороны Ярослав Надь опубліковав правну аналізу резорту обороны, котра мала служыти як єдно зо становиск на його інформуваный вердікт в процесі, і то на соціалній сіті в половині мая 2023-го року.(TASR, Pkf)