Депутаты Выбору народной рады Словацькой републікы про културу і медії за SNS Карол Фаркашовскый і Душан Тіттел будуть ініціовати надзвычайне їднаня парламентного выбору. Причінов суть медіалізованы інформації о придільованю дотацій про ромскы културны актівности в рамках Фонду на підпору културы народностных меншын. Депутаты пропонують на тім засіданю выслухати директора фонду Норберта Молнара і жадати поясніня способу схвальованя дотацій. „Партія SNS выражать серьйозне знепокоїня над підозріньом з нетранспарентного перероздільованя средств,“ повіли депутаты. Кавза дотулять ся інформацій, котры приніс портал Aktuality.sk. Портал писав о тім, же в ромскій раді, котра вырішовала о придільованю грошей на проєкты, сиділи люди, котры самы проєкты подавали. Директор фонду інформовав, же закон порушеный не быв, кідьже платить, же покля член рады має конфлікт інтересів в припаді даякого проєкту, напише о тім честне выголошіня і конкретный проєкт не оцінює ани о нім не голосує.
(TASR, Медвідь)