Презідент Словацькой републикы Андрій Кіска вчера выменовав Даньєла Змека за началника Ґенералного штабу Озброєных сил СР. В середу тоту номінацію одобрила влада СР. У функції вычерять Мілана Максіма. Кіска в прослові вызвав Змека, жебы не скламав довіру жытелїв країны: „Армада має все найвысшу довіру жытелїв нашой країны. Перед армадов але теперь стоять дуже великы вызвы. Довіра нашой сполочности, довіра влады, довіра презідента ся проявила і тым, же про армаду были вычленены, скуточнї історічно обровскы фінанчны средства на модернізацію. З довіров є звязана і одповідность. Вас шпеціалнї, пан ґенерал Зменко хочу попросити, жебы сьте зробили вшытко што є у вашых силах, жебы сьте довіру людей нашой країны не скламали. Будете під великым, присным дробноглядом публікы, новинарїв але і мене, як головного велителя Озброєных сил, жебы досправды сьме в тім тестї довірягодности перед нашыма жытелями обстояли.‟ Кіска у четверь повышив і ґенералпоручіка Яна Балціара до годности ґенерала, ґенералмаёра Даньєла Змека до годности ґенералпоучіка і бріґадных ґенералів Владїмира Шімка і Йозефа Покорного до годности ґенералмаёра а плуковника Юрая Штефанку до воєньской годности бріґадного ґенерала. Перед выменованём Змека до функції ся презідент стрїтив і з Максімом, котрый тоту функцію заставав дотеперь. Функчный період му кінчіть к 6-му маю.
(TASR, Цітрякова)