Председа SNS Андрей Данко є за то, жебы парламент зволив далшых кандідатів на судців Конштітучного суду Словацькой републікы. О сітуації хоче бісідовати на днешній стрічі з презідентков Зузанов Чапутовов. „Не мам проблем, жебы Slovenská národná strana довыберала потрібну кількость судців, жебы сьме їх доповнили презідентці, але решпектую і коалічный договор. Сьме приготовлены на різны варіанты. За себе бісідую, же треба довыберати кількость кандідатів і треба дати можливость презідентці, жебы собі выбрала,“ повів Данко. Подля председы партії Smer-SD Роберта Фіца бы мала презідентка выменовати з дотеперь зволеных кандідатів трьох судців. Покля то не зробить, Фіцо не видить причіну, чом бы мали волити далшых кандідатів. Авізовав то по понедільковій коалічній раді. На судців моментално кандідує 16 людей, Фіцо не думать, же будуть волити кандідатів на найблизшім засіданю парламенту в четверь.

(Медвідь, TASR)