При отваряні матерьскых школ і основных школ ся іщі мусять дорішыти єднотливы детайлы і шпеціфіка. Діскусії з тімом епідеміолоґів і одборниками у данім звязку надалей продовжують, повів то про пресову аґентуру TASR міністер школства, наукы, дослідженя і шпорту Браніслав Ґролінґ. Резорт школства єдночасно підчеркнув, же в єднотливых країнах Европской унії поступово отваряють школскы інштитуції, але за строгых гіґенічных і безпечностных кроків. О тім, ці будуть школы отворены і на Словакії, ся вырішыть в понеділок 18-го мая, потвердив то премєр Іґор Матовіч. Окрім того авізував тыж то, же кедь ся школы і матерьскы школы отворять, буде то добровольне. (TASR, Pkf)