Вчера, 30-го юла 2024-го року у віці 99 років вмер Штефан Ладижіньскый. Його імя є скапчане з тыма найякостнішыма умелецькыма тілесами, котры мож познати на теріторії цілой бывшой Чехословакії.  Так наприклад, у роках 1945 аж 1948 быв основательом і діріґентом Орхестра словацькой музикы в Братіславі, пізніше познатым під назвов Воєньскый умелецькый колектів капітана Налепкы. В роках 1953 аж 1954 быв умелецькым шефом колектіву Централного дому чехословацькой армії, а у 1954-ім році одышов до Прагы і став драматурґом Армадного воєньского колектіву Віта Неєдлого, што быв централный умелецькый колектів Чехословацькой людовой армії. Пізніше став і умелецькым шефом ПУНА, так само быв шефдіріґентом професіоналного ансамблю SĽUK і намістніком ґенераралного директора державной компанії Slovkoncert, котра занимала ся орґанізованьом музичного жывота. Якраз на тій позіції быв Штефан Ладижіньскый при основаню днесь вже леґендарного театру Štúdio S, днесь Štúdio L+S, котрый выникнув як Умелецька сцена Slovkoncert-у. Театер почав свою діятельность в маю 1982-го року, втогды без властного умелецького колектіву, і Штефан Ладижіньскый став його першым директором. Окрім того Штефан Ладижіньскый по 1989-ім році залучів ся актівно і до русиньского руху. В 1995-ім року быв єдным із основателів Здружіня інтеліґенції Русинів Словеньска, а єден час быв і председом Русиньской оброды на Словеньску. Окрім іншого, почас його веджіня орґанізації, з його ініціатівы, приготовила ся выстава під назвов Русины Словакії, котра мала свою вернісаж у 2000-ім році в Братіславі у Словацькім народнім музею. Выстава пак ішла до Пряшова і до далшых міст выходной Словакії, а часть той експозіції днесь творить експозіцію Словацького народного музея – Музея русиньской културы в Пряшові. Вічная память! Жрідло фотоґрафії: Facebook/ЛЕМ.ФМ (ЛЕМ.ФМ, Пкф)