Презідент Андрей Кіска сі вчера в пополїдні перевзяв з рук словацькых скавтів Бетлегемске світло. Прияв го уж традичні на Намісті святого Едіґія в Попраді. Сімбол покоя, надії і порозуміня ся на Словакії шырить од року 1990. Як інформувала Пресова аґентура Словацькой републикы, Бетлегемске світло принесли на попрадске намістя членкы 78. скавтского збору з Попраду – Светлушкы. “Барз бы єм сі желав, абы з тым світлом прийшов до каждой домашності на свята покій, абы прийшла ласка, абы прийшла охота одпущати і попросити о перебачіня. Абы досправды в цілій Словакії в каждій родині запановала красна різдвяна атмосфера і покы бы ся дало, абы то добро в нашых сердцях зостало чім довше. Вірю, же собі і нашы найвысшы політиці усвідомлять, яку хочеме мати нашу Словакію. Же хочеме мати Словакію досправду як країну погоды і ласкы а не країну ненависті.“
(TASR)

Фото: TASR/M. Siváková