Знамый словацькый банкарь Імріх Береш вчера зробив пресконференцію, котру авізовав іщі минулый тыждень. На ній оголосив, же зачінать зберати підписы на презідентьску кандідатуру. „Од самого початку, уж майже перед роком єм діставав першы вызвы, жебы єм пороздумовав о кандідатурі на посаду презідента Словацькой републікы. Радив єм ся односно того вопросу з родинов, приятелями, но часто і з незнамыма людми. Резултатом розговорів є факт, же єм дав згоду з тым, жебы была спущена петіція на підпору мойой припадной кандідатуры на презідента,“ повів Береш на пресконференції. Презідентьскы выборы на Словакії бы мали быти на ярь 2019-го року. Bереш бы хотів быти обчаньскым кандідатом. Такый кандідат потребує вызберати 15 тісяч підписів, жебы міг быти зареґістрованый. Береш хоче вызберати 30 тісяч, значіть двараз тілько як є потрібне. Аж покля їх вызберать, втогды вырішыть, ці буде досправды кандідовати. Береш є в русиньскім середовиску знамый і як меценат, співфінацовав збудованя точной копії деревняной церькви в Габурі, котрой оріґінал быв іщі за соціалізму перевезеный на теріторію днешньой Чеськой републікы і скулптуру Князя Лабірця, котра стоїть над Габуров. Так само помагать коло орґанізованя шторічной події – фестівалу під назвов Дні Габуры і співпрацує з Фондом Деревяна церковця Габура. За поміч, котру довгы рокы проявлює Габурі, быв выголошеный і за честного обчана Габуры.
(TASR, Медвідь)

Фото: TASR/ P. Zachar