В Чехах є веце як 200-тісяч вольных працовных міст. Дуже низка незаместнаность в країнї має за наслїдок, же фірмы мають штораз векшы проблемы позганяти заместнанцїв, зато їх глядають в цїлій Европі. Чеська економіка зазнає єден з найвекшых растів в Европі. Фірмы мають доста заказок, але спомалює їх недостаток кваліфікованой працовной силы. Подля слов віцепрезідента чеського Союзу промыслу і доправы Радка Шпіцара є треба прияти куртодобы і протикрізовы опатрїня і уможнити так приход робітніків зо заграніча, котры бы помогли злїпшыти сітуацію. Шпіцар позітівно оцїнює владны опатрїня, котры перед роком уможнили фірмам здобыти середнё і менше кваліфікованых заместнанцїв з Україны. Од зачатку проєдку подали фірмы по цїлій Чеській републіцї в рамках Режіму Україна веце як 1300 жадостей о веце як 8000 заместнанцїв. Сітуацію комплікує довга адміністратіва, винов котрой фірмы на свого заместнанця з Україны чекають веце як пів рока. Зато суть фірмы нужены глядати заместнанцїв і в іншых країнах, напр. в Румунії, Булгарії, Іспанії ці Сербії. Якраз Сербія є моментално країнов, котра бы могла заповнити кваліфікованы міста в автомобіловім промылї в Чеській републіцї. Є то з прічіны краху найвекшой серьбской автомобілкы – Застава, котра так уволнила коло 30 000 кваліфікованых заместанцїв. Інформацію принїс портал aktuality.sk. (Зденка Цітрякова)