Передвыповнены признаня к дани з моторовых возидел суть новым опатрїнём Фінанчной справы Словацькой републикы. Їх цїлём має быти зєднодушыти мотористам їх подаваня. Доступны будуть на порталї фінанчной справы о три тыжднї. В четверь тото опатрїня представив на пресконференції презідент фінанчной справы Франтїшек Імрезе.„Зачінаєме з данёвым признанём на дань з моторовых возидел. Будеме то реалізовати тым способом, же данёве признаня буде автоматічно выґенероване з інформачных сістемів фінанчной справы, на нїм буде вырахована актуална данёва садзьба а данёвник потім, як передвыповнене данёве признаня сконтролює, значіть кідь го дістане, го уже лем сконтролює і наслїдно подасть“, обяснив Імрезе. Огляд ся буде брати на індівідуалну сітуацію каждого клієнта, то значіть на почет місяцїв, протягом котрых быв автомобіл вывжываный і конкретна данёва садзьба про конкретне возидло. Данны будуть выходити з інформації якы має фінанчна справа. Данёвник дістане справу до своёй індівідуалной зоны на порталї фінанчной справы, де найде і лінк з данёвым признанём. До нёго клієнт начітать данны а тоты ся му автоматічно зобразять на данёвім признаню. Улегчіня выповнёваня данёвого признаня бы ся мало в будучности дотулити і далшых другів даней, інформовав Імрезе.
(TASR)