Бывшого каталаньского премєра Карлеса Пуждемона і штирьох ексміністрів його влады, котры ся в неділю дали до рук белґійскых урядів, условно пропустили. 5 каталаньскых політіків не може одыйти із Белґії і мусять інформовати, де ся находять. Подля інформацій порталу BBC бы ся мали до 15 днів поставити перед белґійскый суд. Белґія має 60 днів на то, жебы їх выдала до Іспанії, котра на них дала міджінародный приказ на затриманя. Політіци суть обвинены із бунту ці дефравдації, чого ся мали допустити зорґанізованьом референдума о незалежности Каталанії, но головно тым, же 27-го октобра выголосили незалежность Каталанії од Іспанії. Пуждемон, котрый одышов до Брусела, вызвав вшыткы політічны партії Каталанії боюючі за незалежность ку соєдиненю в повязаню із реґіоналныма выборами, котры Мадрід выписав на 21-го децембра. Так само повів, же кампань перед выборами планує робити із Белґії.
(Петро Медвідь)