Америцькы Русины днесь 26-го октобра мають своє свято – День Русинів. Цілоденне святкованя приготовив Карпаторусиньскый конзорціум Северной Америкы, де належать вшыткы русиньскы орґанізації Споєных штатів Америкы. З той нагоды буде на радніці в америцькім місті Клівленд вывішена русиньска застава. Окрем богатого културно-научного проґраму прийме Русинів америцькый сенатор Майкл Скіндел з Огая, котрый мать по матери русиньске коріня. За своє свято собі америцькы Русины выбрали 26-ый октобер, бо на осінь 1918-го рока пришли до Ню Йорку представителі двадцятьох державотворных народів меджі нима і делеґація Русинів, з цільом вытворіня Середньоевропской демократічной унії. 26-го октобра ся стрітили в історічній Салі незалежности в Філаделфії, де была выголошена і підписана Декларація, внаслідку котрой выникла 28-го октобра 1918-го року Чехословацька републіка, до котрой належала і бывша Підкарпатьска Русь.
(Петро Кімак-Фейко)