Вікендове высловіня америцького президента Доналда Трампа на адресу Северной Кореї суть ясным выголосіньом войны. Повів то вчера міністер заграничных справ Корейской народно-демократічной републикы Рі Йонґ-го. Северна Корея сі на основі шефа свойой дипломації – у звязку із хартов Орґанізації зєднаных народів – становлює право зробити вшыткы крокы на свою самооборону. Меджі такы крокы належать, на основі слов Рі Йонґ-гоа і „право зострілити америцькы стратеґічны бомбардеры, і в тім припаді, кібы неперекрочіли границі воздушного простору Корейской народно-демократічной републикы“.
Споєны штаты “невыголосили войну Северній Кореї“. Такыма словами реаґував Білый дом на высловіня шефа северокорейской діпломації. “Невыголосили сме войну Северній Кореї і отворені повідано, тото тверджіня є абсурдне,“ увела то на прес-конференції говоркыня Білого дому Сараг Сандерсова, котру цітовала аґентура ДПА.
(Петро Кімак-Фейко)