Найменше 8 мертвых і 23 зраненых собі выжадав силный гурікан Ірма, котрый в середу засягнув дакілько меншых островів в северовыходній части Карібского моря. Біланція жертв ся дотулять лем Франціов справлёваных осторвів в Карібіку. Девяту жертву голосили уже перед тым з островного штату Антіґуа а Барбуда. В ночі Ірма засягла карібскы островы Туркс а Каікос, де собі выжадала далшы жертвы на жывотах. Фіналне чісло мертвых або зраненых може быти іщі векшых, бо захранны тімы іщі незакінчіли сондованя на дакотрых островах. Жытелї карібского острова Гіспанёла, на котрім суть і штаты Гаіті а Домініканьска републіка ся приправлюють на приход гурікану. Очекують великы аж шість метровы волны. Подля метеоролоґів Ірма дале замірить на Кубу, Багаміа через вікенд має засягнути америцькый штат Флоріда. Там вызывають жытелїв, жебы решпектовали приказы на повинну евакуацію з огроженых областей. З побрежных областей ту евакуують аж пів міліона людей. Заперли школы а люде чекають в довгых шорах на пумпах. К повинній евакуації приступив і штат Джорджія, котрый є на пути гурікану Ірма. Ірма є гуріканом найвысшой 5 катеґорії, зо скоростёв вітра аж 300 км/в год. Іде о найсилнїшый гурікан зазнаменаный в области Атлантіцького оцеану за десятьроча.
(Зденка Цітрякова)