Сербскый міністер загранічных справ Iвіца Дачіч пропоновав розділіня Косова поздовж етнічных граніць і одторгнутя його сербской северной части. Пропозіція ся одкланять од офіціалной позіції Белеграду, подля котрого Косово, бывшый реґіон Сербії з 90-процентовов албаньсков векшынов, є сербсков теріторіов, хоць Косово в 2008-ім році выголосило незалежность. Дотеперь незалежность Косова узнало 114 членьскых штатів. Но Росія як споєнець Сербії заблоковала вступ Косова до Oрґанізації споєных народів. Белеград спочатку не приїмав будьякый контакт із новым штатом, але поступно ся підволив тиску меджінародной позіції і пристав на розговор o нормалізації білатералных контактів пропонованых через Европску унію. Хоць были підписаны договоры в области транспорту, енерґетікы, обходу і освіты, тоты оставають без імплементації a Белеград надале не хоче узнати незалежность Косова. Пропозіця Дачіча рахує із споїньом косовского северу зо Сербійов, як і з окремов автономійов про сербскы монастырі на косовскій теріторії. Очекує ся, же Пріштіна тоту пропозіцію не прийме. Споєны штаты і Eвропска унія будьякы зміны граніць не приїмають.
(Анна Кузмякова)