Професійный союз школства выголосив у віторок штрайкову поготовость. Хоче підкреслити тырваючу неспокійность із фінанцованьом словацького школства і потвердити приготовленость робітників просаджовати пожадавкы профсоюзників і посередництвом натисковых акцій. Інформовав о тім председа союзу Павел Ондек. Як Ондек про TASR повів, наперек веце їднаням представителів профсоюзу з представителями Міністерства школства і Міністерства фінанцій СР не быв до днешнього дня підписаный жадный договор о сповніню пожадавок, котры были акцентованы і посередництвом протесту Школство в смутку – протест в чорнім. Єднов з пожадавок школьскых профсоюзників є піднятя таріфных платів вшыткых робітників школства в роках 2025 і 2026 мінімално о десять процент.

(Медвідь, TASR)