В сербскій Суботиці на Основній школі Іван Ґоран Ковачіч одбыла ся 19-го новембра 2024-го року святочна подія з нагоды початку навчаня русиньского языка з елементами народной културы. Інформує о тім портал Радіо-Телевізія Войводины. Школярів і родічів привітали представителі Націоналного совіту Русинів, од котрых ініціатіва вышла, директорка школы, на котрій буде навчаня проходити, як учітелька Мая Доміч, котра буде школярів у Суботиці учіти. На русиньскый язык записало ся затля пятьнадцятеро школярів із шестьох основных школ в Суботиці, котры ходять од 2-ой до 8-ой класы. Навчаня буде орґанізоване у єдній ґрупі про вшыткых, і перша година буде 7-го децембра. Суботиця із своїма майже 89 тісячами жытелів, за остатнім списованьом із 2022-го року, є другым найвекшым містом у Автономній покраїні Войводина, по столиці области – Новім Саді. Єдночасно є найсевернішым містом Сербії, находить ся близко, лем десять кілометрів од граніць із Мадярьском. Суботиця є адміністратівным центром Северобачского округу. Фото: rtv.rs.  (ЛЕМ.ФМ, Пкф)