Місто Подолинець програло судный спор зо штатом і на основі розсудку мусить найпізніше до 13-го децембра заплатити 360.000 евр. Самосправа вердікт поважує за несправодливый. Кавза є повязана з будовами, котры місто одкупило іщі в року 2017-ім од Міністерства внутра СР з цільом оправы кіна, реконштрукції ґімнастічной салы, выбудованя мултіфункчного і дітьского гріска. К реалізації покы недошло, протоже фундушы під будовами, котры патрили резорту обороны небыли вырівнаны. Резорт внутра  місто зажаловало за неповніня договору, кідже споминаны актівіты мало выконати до двох років. Пріматор Міхал Маргефка про пресаґентуру TASR увів, же покы незнать, ці ся проти вердікту Окресного суду Стара Любовня одкликають. Споминану суму шак немають з чого заплатити, кідьже є то коло десять процент їх рочного розрахунку. (LEM.FM, Pkf)