Чеськый презідент Петр Павел в понедільок з нагоды Дня выникнутя Чехословакії, котрый є державным святом в Чеській републіці і на Словакії, нагородив 56 особностей. In memoriam нагородив наприклад і Папу Йоана Павла ІІ., ордены однесли собі і польска режісерка Аґнєшка Голланд, співаци Петр Янда і Маріє Роттрова ці писатель Павел Косатік, котрый занимать ся історійов Чех і Словакії. Презідент означів выникнутя державы за „щастливу подію і великый дар про вшыткы слідуючі ґенерації“. Підкреслив, же на розділ од многых іншых країн Чеська републіка жыє в історічно найдовшім періоді слободы, покоя і економічной просперіты. За його словами не треба смотрити далеко за граніці Чеськой републікы, жебы собі усвідомити, з яков легкостьов і скоростьов може доходити ку ерозії фундаментів демокрації, причім ку тому не додав жадны подробности.

(Медвідь, TASR)