Презідент СР Петер Пеллеґріні у четверь одпутовав до польского Кракова на стрїчу презідентів ґрупы Арраіолос. Лідры будуть днесь роковати в Кракові на градї Вавел, історічній резіденції польскых кралїв. Головнов темов тогорічного саміту суть выглядкы на проглубіня трансатлантічных одношінь в часї ґлобалных вызев і грозеб. Тот рік саміт гостить презідент Польской републікы Анджей Дуда. За єдным роковачім столом ся стрїтять презіденты Булгарії, Естонії, Ґреції, Хортватії, Мадярьска, Нїмецька, Латвії, Польщі, Словакії, Словінії і Італії. Темы будуть повязаны з пріорітами польского председництва в Европскій унії в першім півроку 2025. Піде о розшырёваня ЕУ, реконштрукцію Україны, енерґетічну безпечность і европску безпечность ці нелеґалну міґрацію.

(TASR, Шутіова)