В понедільок 26-го авґуста одбыло ся 15-те засіданя Заступительства Пряшівского самосправного краю (ПСК). Посланці мали на проґрамі 35 пунктів засіданя, з чого єден дотуляв ся одкупліня будовы про Театер Александра Духновіча (ТАД) в Пряшові. Єдиный професіоналный театер у світі, котрый грає в русиньскім языку, довгодобо быв із свойов Великов сценов лем в арендованых просторах, кедьже в рештітуціях будову здобыла Римокатолицька церьков. При голосованю было в салі участных 51 посланців ПСК, і вшыткы єдноголосно по куртій діскусії заголосовали за пункт, жебы край одкупив будову про Театер Александра Духновіча. Заступительство схвалило здобытя нерухомого маєтку, ставбы і фундушів – цілково 665 метрів квадратных. Продаваючім є Римокатолицька парохія святого Николая в Пряшові, частьов пропозіції є акцептованя бремен, котры там суть. Часть будовы Католицького кругу собі парохія зохаблять. Край одкупить будову про ТАД за суму 2 066 000 евр, котра вышла подля фахового посудку. Театер по веце як 30-ох роках буде у властній будові, і будуть годны плановати ся реконштруцкії, котры дотеперь не было мож, кедьже край будову не мав у своїм маєтку.

(Медвідь)