У Шведьску четверь потвердили першый припад опічіх кягней горшой варіанты Clade I. Іде о першый припад той варіанты діаґностікованый мімо африцького контіненту. Світова здравотницька орґанізація (WHO) в середу выголосила став огрожіня верейного здравя меджінародного значіня в повязаню з пошырёванём захворїня опічіх кягней в африцькых штатох. Вірус ся шырить у веце як десятёх африцькых країнах, причім потенціал далшого пошырёваня в Африцї і мімо нєй є подля ґенералного директора WHO Тедроса Адганома Ґебреєсуса барз знепокоюючій. Опічі кягнї суть інфекчне захворїня, котре ся переношать при близкім контактї. Мають сімптомы подобны хрипцї, причім способлюють і гнісаючі выражкы. Векшына припадів проходить мірно, але тото захворїня може і забивати.

(TASR, Шутіова)