У віторок 2-го юла в братіславскім готелі Bôrik одбыло ся 53-те засіданя Выбору про народностны меншыны і етнічны ґрупы. Членове дістали на засіданю інформацію о діятельности народностных музеїв, Фонду на підпору културы народностных меншын і народностнім высыланю в бывшій RTVS, котра од 1-го юла стала STVR. Уповномоченый влады СР про народностны меншыны Акош Горонь інфомровав членів выбору, же бы то мало быти посліднє засіданя того орґану. В парламенті была схвалена зміна компетенчного закона, на основі чого бы ся в септембрі мала вытворити Рада влады про народностны меншыны. Моментално ся робить на штатуті рады, котрого текст буде конзултованый з членами выбору за народностны меншыны, якым затля далше продовжує мандат.

(Медвідь)