На граді Любовня  выставили цінне діло Енді Варгола, котре в рамках експозіції ловецького салоника Палаца Любомірьскых буде мож видіти до кінця септембра того року. Інформовала о тім аґентура TASR. Директор Любовняньского музея Далібор Микулик повів, же іде о комплетне портфоліо Кральовной Нытомбі. Його цінность потверджує головно факт, же іде о такзавну кральовску едіцію посыпану діамантовым порохом. „Значіть то, же його частями суть штири образы той самой кральовной, но все в іншій фаребній варіації, причім за комплетне портфоліо бере ся комбінація вшыткых штирьох образів, котры творять єден цілок. Тото портофіліо Кральовной Нытомбі є зроблене техніков screenprint – сітьодрук, котру Енді Варгол хосновав майже при вшыткых своїх творах,“ повів Микулик. Світово познатый твор Енді Варгола подарило ся в Старій Любовні выставити вдяка співпраці з Музейом модерного уменя Енді Варгола в Меджілабірцях, одкыль го перевезли. Як дале сконштатував директор, же їх  цільом было такым сімболічным способом скапчати кральовны Енді Варгола з кральовнами, котры колись навщівили їх град, ці то была угорьска кральовна Марія І. або як послідня іспаньска кральовна Ісабел де Борбон. Фотоґрафія: Лубовняньскый музей. (ЛЕМ.ФМ, Пкф)