Пряшівска ґрекокатолицька архієпархія выголосила 22-го марца вызву на передкладаня жадостей о поміч по землетрясіню, котре засягло выходну Словакію 9-го октобра минувшого року. До вызвы можуть залучіти ся парохії Пряшівской архієпархії, в котрій было пошкодженых 52 будов, з того 45 храмів. Вытраты на рішіня наслідків лем в ставебній области суть веце як 900 тісяч евр. Парохії можуть загнати жадости до 16-го апріля, а можуть пожадати о оправу храмів і фарьскых будов. Як інформовав Інформачный центер Пряшівской архієпарії, дотація може быти схоснована і на уж зреалізованы роботы, кедьже період реалізації є од 1-го новембра 2023-го до 30-го авґуста того року.

(Медвідь, ISPA)