Бывшый америцькый презідент Доналд Трамп не дасть Україні фінанції на боротьбу проти Росії, покля выграть в новембровых вольбах і стане знова презідентом. Твердить то мадярьскый премєр Віктор Орбан, котрый минувшый тыждень із Трампом стрітив ся в Споєных штатах, інформує аґентура Reuters. За словами Орбана Трамп „не дасть ани цент до україньско-російской войны, і война тым скінчіть“. Подля мадярьского премєра є ясным, же Україна на своїх ногах не докаже стояти. „Покля Америчаны, а ани Европаны не дадуть грошы і зброю, тота країна скінчіть. Покля Америчаны не будуть давати грошы, Европаны войну самы фінанцовати не докажуть,“ твердив далше Орбан. За його думками „іншым вопросом“ є, якый буде резултат будучіх мірных переговорів, котры будуть наслідовати по підписаню переміря, і як буде мож створити стабілну і безпечну Европу.

(Медвідь, TASR)