Презідентка Словацькой републікы Зузана Чапутова крітікує замір влады схвальовати леґіслатіву повязану зо зрушіньом Уряду шпеціалной прокуратуры в скороченім леґіслатівнім процесі. Выходить то з їй выголошіня, котре дала в середу про медії. Презідентка повіла, же способ і скорость, в котрій мають быти прияты так вызначны зміны, єй шоковали. Владный кабінет в середу схвалив зрушіня Уряду шпеціалной прокуратуры. Кавзы, котры рішыть, мають перейти до аґенды крайскых прокуратур. Влада так само схвалила, жебы пропонованы леґіслатівны зміны проїднали ся в парламенті в скороченім леґіслатівнім процесі. Вєдно з тым має єднако проїднати ся і новела закона о охрані зголошователів протисполоченьской діятельности. Ку темі озвала ся і Европска комісія, котра потвердила, же пожадала Словакію, жебы не продовжовала в новелізації Карного закона і зрушіню Уряду шпеціалной прокуратуры, бо тоты пропозіції треба добрі продумати.

(Медвідь, TASR)