Пропозиція штатного розрахунку на будучій рік піде на їднаня влады аж будучій тыждень. Передтым в нім мусять быти запрацюваны консолідачны опатріня, котры кабінет одобрив вчера. Премєрь Роберт Фіцо потвердив, же в року 2024 ся уплатнить 13-та пензія в цалковій вышці. В цалковім розсягу ся заховать і родичовска пензія, котра буде выплачена єдноразово в юні за цілый рік 2024. Значно веце фінанцій мать іти до здравотницьтва в сумі коло 250 міліонів евр. Влада так хоче од банк выбрати на додаточнім зданіню скоро 340 міліонів евр. Солідарный вклад з продукції ропных продуктів бы мав принести асі 170 міліонів евр. Дальшы гроші ся найдуть звышованям спотребных дани з алкоголу ці табаку, але і різных поплатків. Гроші на выплачіня родичовской пензії в дотеперішній вышці ся подля премєра найдуть понижованям одводу до 2-го пензійного пілієра з днешніх 5,5% на 4%. Соціална поіщовня так здобуде додаточны джерела. (TASR, Pkf)