Progresívne Slovensko (PS) поважує насаджіня поліції з Мадярьском за дорогый театр. Цільом Роберта Фіца і його влады є подля лідра PS і підпредседы Народной рады СР Міхала Шімечкы одпутаня позорности од реалных проблемів Словакії, як і од “чісток“ в поліції. “Актуалный театр на границі лем рострепує фінанціями і людьскыма капацітами нашой країны. Реалне рішеня собі выжадує політичну одвагу і способность договорити ся в рамках Европской унії,“ увів Шімечка. Підчеркнув, же транзітна міґрація через Словакію веце як місяць прудко ся понижує. Прічінов суть подля нього опатріня країн на тзв. балканьскій дразі і зміна погоды. (TASR, Pkf)