В понедільок 23-го октобра в просторах Уряду уповномоченого влады Словацькой републікы про народностны меншыны проходила вольба двох новых членів Выбору про народностны меншыны і етнічны ґрупы. Уповномоченый про меншыны Ласло Буковскый вольбу выписав на основі зміны штатуту, в рамках котрой народностный выбор схвалив, же вєтнамска меншына, яка была офіціално вызнана, буде мати у выборі єдного члена, а так само ся на основі резултатів списованя жытелів дасть Русинам, котры мали дотеперь двох членів, о єдного веце. На члена кандідовав Мартін Караш, председа Русиньской оброды на Словеньску, котрый дотеперь быв заступником члена выбору, а на заступника кандідовав Мафтей Допіріяк, сучасный секретарь Округлого стола Русинів Словакії. Обидвоми были зволены. Караш став третім русиньскым членом выбору, де буде вєдно з Петром Медвідьом і Міланом Яном Піліпом.

(Медвідь)