Выход Словакії в понедільок о 20.23 год. засягло землетрясіня. Трясіня было чути на веце місцях в Пряшівскім і Кошыцькім краю. Люди чули як ся трясе земля, меблі ці погары. Дакотры евідують попуканы стіны, опадану ваковку, порозбиваны образы, дзеркала із стін ці вазы. Землетрясіня мало мати силу 4,9 маґнітуды. Было в глубці десять кілометрів і епіцентер ся мав находити коло десять кілометрів юговыходні од міста Стропків. Інформовало о тім Міністерство внутрішніх справ Словацькой републікы. Міцьне землетрясіня было чути і в селі Кваковці на Домаші. Як інформовав староста села Радован Капраль, на Домаші одторгло шыфу Богемія, котра вже была зазимована, пошкодженый быв і костел. Пошкоджіня церькви голосила і Ґрекокатолицька парохія в Пакостові. В Гуменнім землетрясіня запричінило гаварію на рулі з теплов водов.

(Медвідь, TASR)