Грады на Спіші суть з гланов літньов сезонов спокiйны, найвекшый нарост чісла навщівників зазначіли на Кежмарскім граді. Діректорка Музея в Кежмарку Еріка Цінтулова про пресаґентуру TASR повіла, же од зачатку рока евідують высше 43.500 навщевників, што є о третину веце як в минулім року. В часі юла і авґуста притім на град пришло скоро 20.000 людей. Навщівность Спішского граду знову овпливнила реконштрукція вышньой часті, котра не є доступнов. Турістів там было прото о дашто менше як в минулім року. Напрік тому в часі літа зазначіли нарост. Заступкыня діректоркы Словацького народного музея – Спішске музеум в Левочі під котрый Спішскый град патрить увела, же цілково евідують веце як 80.500 турістів, з того 66.000 было на граді. Отіліа Барлікова з маркетінґового одділіня Любовняньского музея сконштатовала, же од зачатку рока град і сканзем в старій Любовні навщівило веце як 174.000 турістів, што представує  10-процентный нарост чісла проти року 2022 і то є добре чісло, бо од януаря аж до марця быв град доступный лем через вікенды.  В юлі і авґусті нашло драгу на град скоро 111.000 турістів што є згодне чісло з минулым роком. (TASR, Pkf)