Высловы мадярьского премєра Віктора Орбана спохывнюють сувереніту Словакії, і є то неприятельне. Выголосив то днесь лідер партії SaS Ріхард Сулик в реакції на высловы Орбана о Словакії як о „одорваній теріторії“. Лібералы поважують за правилне, же собі резорт діпломації покликав мадярьского амбасадора. Сулик повів, же є неприятельным, жебы южный сусід будьякым способом спохыбньовав сувереніту і теріторіалну цілость Словацькой републікы. Слова Орбана суть подля нього іщі важнішы, кедьже Росія вже другый рік веде аґресівну войну на Україні. Віктор Орбан почас вікенду на літній універзіті Мадярів у Румунії крітіковав мадярьску меншыну на Словакії, котра наперек тому, же творить коло десять процент населіня, не є способна забезпечіти собі свою участь в парламенті. Сітуацію означів за слабый выкон, покля хтось хоче дашто зробити про свою отцюзнину в „одорваных частях країны“. Высловы Орбана уж вчера остро одсудила партія Hlas-SD, председа SNS Андрей Данко вірить, же то были „слова в емоціях“, а граніці Словакії суть про председу націоналістів „святы і незмінны“.

(Медвідь, TASR)