Мадярьско і Кірґізія суть частьов ґлобалной векшыны, котрой інтересом є досягненя міру на Україні. В понедільок то акцентовав мадярьскый міністер загранічных діл і вонкашніх економічных односин Петер Сійярто по стрічі зо шефом кірґізькой діпломації Женбеком Кулубаєвом. Подля мадярьского міністра уж обидві тоты державы заплатили высоку ціну за войну на Україні, причім за ню не несуть жадну одповідность. Сійярто так само вызвав Европску унію укріпити звязы меджі Унійов і Середньов Азійов. Як додав, окремый договор о партнерстві меджі ЕУ і Кірґізійов, котрый быв парафованый іщі у 2019-ім році, бы мав быти штонайскорше підписаный. На третім засіданю мадярьско-кірґізькой стратеґічной рады обидві стороны підписали договор о співпраці в области охраны жывотного оточіня.

(Медвідь, TASR)