В середу 24-го мая 2023-го року одбыло ся 49-те засіданя Выбору про народностны меншыны і етнічны ґрупы Рады влады Словацькой републікы про людьскы права, народностны меншыны і родову рівность. Засіданя вже традічно проходило в братіславскім владнім готелі Bôrik. Представителі меншын обговорили веце концепчных матеріалів, але так само рішыли діла, котры вказали ся в останім часі і прямо дотуляють ся народностных комуніт на Словакії. В проґрамі майового засіданя быв єдным з найважнішых пунктів інформація о річных оцінках роботы народностных музеїв на Словакії за 2022-ый рік. Тот концепчный матеріал передкладав Браніслав Паніс, ґенералный директор Словацького народного музея (СНМ), під котрый належать народностны музеї. Мож сконштатовати, же Словацькый народный музей – Музей русиньской културы в Пряшові за послідні рокы здобывать позітівны резултаты, што до його цілковой діятельности, хоць іщі все мусить робити на підниманю чісла навщівників, ці на научно-бадательскій роботі. Русиньскы представителі у народностнім выборі, котрыма суть Петро Медвідь і Мілан Ян Піліп, звернули в діскусії увагу і на тему реконштрукції музея, котра є потрібна і помалы безодкладна. Ґенералный директор быв зогдный з тым, же СНМ – Музей русиньской културы потребує перейти цілковов реконштрукційов і повів, же то єдна з пріоріт СНМ. Як повів Паніс, была схоснована вызва, в котрій быв поданый проєкт на 500 тісяч евр. З того проєкту бы ся мала зробити технічна документація потрібна ку реконштрукції, і мав бы ся выписати архітекточный конкурз. Тот проєкт Міністерство културы Словацькой републікы, як зряджователь СНМ, подало на Міністерство фінанцій. (ЛЕМ.ФМ, Pkf)