Годинов вопросів в понедільок скінчіло двотыждньове пленарне засіданя мадярьского Народного згромаджіня. Опозіція почас нього остро крітіковала владу премєра Віктора Орбана за енормно высоку інфлацію. Політіци опозічных партій часто хосновали і термім Орбановска інфлація. Посланець партії Jobbik Андер Балаж припомянув, же в порівнаню з Українов, де є война, мадярьскы ціны вказують страшный образ, роснутя цін потравин є в топ 10 на світі і просив ся, як є конечно можливе дістати інфлацію на єдноціфрове чісло. Подля державного секретаря резорту господарьства Яноша Фонадія є цільом влады дістати інфлацію під 10 процент до кінця рока 2023. Як додав, Мадярьско є на добрій пути і інфлація вже кулміновала в януарі а зачало мірне знижованя. Сервер 24.hu в повязаню з тым підкреслює, же і в марці была інфлація над 25 процент.

(Медвідь, TASR)