Чеськый презідент Петр Павел в понедільок вєдно із своїм тімом перебрав ся з дочасной резіденції в Гырзаньскім палаці до канцеларій на Пражскім граді. Презідентьска канцеларія дочасно резідовала в Гырзаньскім палаці, котрый служыть на репрезентатівны цілі чеського председы влады. Премєр Петр Фіала зволеному презіднетови по вольбах запропоновав, жебы го хосновав, покля офіціално не хопить ся свого уряду. Презідент в палаці зістав іщі дакілько тыжднів по своїй інавґурації з 9-го марца. Причінов быв страх з того, же на Пражскім граді можуть быти намонтованы заряджіня на підслухованя, і так дав град сконтрольовати.

(Медвідь, TASR)