Дочасно повіреный премєр Едуард Геґер зачінать у депутатів зберати підписы на підпору його влады. В тім тыждню спробує позберати потрібных 76 підписів і наслідно їх передложыти презідентці Зузані Чапутовій. Геґер хоче одділити діскусію о новій 76-ці і дебату о передчасных вольбах. Председа парламенту і руху Sme rodina Боріс Коллар бы быв згодный з новов векшынов 76-ох депутатів лем в припаді доїднаня ся на передчасных вольбах. До кінця януара хоче мати Геґер выїднану підпору. Його амбіційов є, жебы влада продовжовала до кінця волебного періоду в році 2024. Повіреный премєр вірить, же наконець здобуде і підпору Коллара, як і партії SaS, причім декларовав, же з лібералами їднать і одкликує ся на то, же ціль Ріхарда Суліка, жебы Іґор Матовіч не быв членом влады, є сповненый.

(Медвідь, TASR)