В Мадярьску днесь зачав цілодержавный штрайк учітелів, котрый выголосили дві профсоюзны орґанізації педаґоґів. Штрайк підтримують і школярі а штуденты. Педаґоґове зорґанізовали цілодержавну демонштрацію уж 26-го новембра, кедь передали петіцію Міністерству внутрішніх справ, під котре належыть і школство. В петіції жадають зміны у освіті од матерьской школы аж по універзіты, діалоґ о обнові школства, доставірне інформованя людей о школстві з боку влады і публічных медій, закінчіня застрашованя учітелів ці ліпше оцініня свойой роботы. Серія цілодержавных протестів зачала в януарі. Плат учітелів в Мадярьску досягує лем 60 процент середньой мзды людей з высокошкольсков освітов, покля на Словакії то є 70, а в Австрії аж 85 процент.

(Медвідь, TASR)