1-го октобра 2022-го року зачало списованя жытелів в далшых двох країнах, де жыють і Русины- в Сербії і Мадярьску. В Сербії списованя жытелів проходить лем старов, „папірьовов“ методов. Жытелів будуть навщівльовати комісарі списованя, котры бы мали робити інтервю з каждов особов окремо, покля то не є можливе. Єден член обыстя може подати інформації за вшыткых членів. Списованя в Сербії закінчіть ся 31-го октобра. Русины в Сербії так само залучіли ся до сполочной кампані ку списованю, кедь перевзяли і хоснують ґрафіку, яку сьме могли видіти і в далшых країнах. Гесло Сьме Русины хоснують у своїй варіанті русиньского языка – Руснаци зме. Мадярьско має комбіновану форму списованя. Од способу вашого выберу залежыть і дата, коли можливость списати ся кінчіть. Покля ся хочете списати електронічно через портал списованя, пак маєте час лем до 16-го октобра. Пак бы мала быти онлайна форма заперта і наступить традічный способ списованя посередництвом комісарів, котры за вами прийдуть домів. Списованя, котре пак буде проходити уж лем „папірьово“, буде кінчіти 20-го новембра. (ЛЕМ.ФМ, Pkf)