Брітаньскый резорт обороны днесь інформовав, же російскый презідент Владимір Путін правдоподобно оголосить приєднаня окупованых теріторій Україны до складу Російской федерації почас свого пятніцьового прояву в парламенті. Інформацію принесла аґентура Reuters. Шеф Кремля має мати в пятніцю прояв у обидвох палатах парламенту. Російскы лідеры подля брітаньского міністерства майже стопроцентно надіяють ся, же выголошіня о приєднаню україньскых теріторій буде спринимане як оправданя такзваной шпеціалной воєньской операції і поможе посилнити патріотічне настроїня на підпору конфлікту. Псевдореферендумы в Донецькій, Луганьскій, Херсоньскій і Запорожскій области о приєднаню до Росії зачали минувшый тыждень в пятніцю і кінчать днесь. Плебісціты были зорґанізованы наперек тому, же російскы і проросійскы уряды не мають повну контролю ани над єдным з тых реґіонів.

(Медвідь, TASR)