Днесь, в понедільок 26-го септембра 2022-го року спочатком о 12.00 год. в обрядовій салі Ґлорія в Пряшові одбыв ся похорон Гавриїла Бескида, котрого сьме знали як педаґоґа, културно-освітнього діятеля, публіцісту, автора великого чісла статей, співавтора Русиньскых народных календарів, автора книжок Вызнамны про Русинів і Николай Бескид на благо Русинів, члена Русиньской оброды на Словеньску і далшых русиньскых орґанізацій, довгорічного председу Руського клубу 1923 і Русиньского културно-освітнього общества Александра Духновіча. Гавриїл Бескид быв безперестанным бойовником за навернутя Руського дому в Пряшові до рук вшыткых Русинів. Актівный быв до высокого віку, аж покля його всесторонну діялность перед пару роками не загамовав здравотный стан. Посліднім вызнамным оцініньом, котре му было призначене, было тот  рік. Вседержавне общество русиньской інтеліґенції імени Антонія Годинкы нагородило Гавриїла Бескида Памятна премійов імени Антонія Годинкы за вызначну діятельность у ділі сохраненя русиньской културы.  Памятна премія му была передана у віторок 20-го септембра, у четверь 22-го септембра Гавриїл Бескид у віці 92 років, лем пару днів перед своїма народининами, одышов на вічность. Смертьов Гавриїла Бескида русинське середовиско, нелем на Словакії, страчать велику особность. Но плоды його великой роботы на хосен Русинів ту про нас будуть навсе. Вічная йому память, блаженый покій!(ЛЕМ.ФМ, Pkf)