Японія у четверь авізовала, же уволнить строгы превентівны крокы про загранічных турістів заведжены почас пандемії коронавірусу. Країна так по два а пів року зась отворять свої граніцї, інформовали аґентуры AFP i AP. ,,Японія конечнї зась отворить граніцї,“ написав на соціалній сїтї Твітер японьскый міністер про діґіталізацію Таро Коно перед преявом містного премєра Фуміа Кішіду в Ню Йорку. Кішіда наслїдно на тисковій конференції потвердив, же строгы рештрікції про загранічных навщівників приходячіх до Японії уволнять протягом будучого місяця, а то першыраз од зачатку пандемії коронавірусу, припоминать аґентура AP. Японьскый премєр уточнив, же в країнї будуть од 11.октобра вітаны і турісты путуючі самостатно, не лем в ґрупах.

(TASR, Шутіова)