Латвія у четверь збуряла памятник припоминаючій вітязство Совєтьского союзу в другій світовій войнї. Зробила так в реакції на російску інвазію на Україну наперек протестам містной російской меншыны. TASR справу перевзяла з аґентуры AFP. На одстранїня 79 метрів высокого памятника, котрый ся находить в головнім містї Ріґа, латвійскы уряды поужыли демолачны машыны. Уж день передтым збуряли дакілько бронзовых сох, котры были тыж частёв монументу. Памятник поставили в роцї 1985 з нагоды 40. юбілея вітязства Совєтьского союзу над націстічным Нїмецьком. Подля узнесіня латвійского парламенту але мусять быти вшыткы совєтьскы сохы, таблы і басреліефы до 15. новембра одстранены.

(TASR, Шутіова)