Конфлікт з Російов на Україні ся нескінчить дотогды, покы небуде ослободженый Москвов анектованый Кримскый півострів в Чорнім морю, выголосив в ночі на днесь україньскый презідент Володимир Зеленськый. Пресаґентура TASR справу перевзяла з аґентуры DPA. “Крим є україньскый і николи ся го невздаме,“ повів Зеленськый у своїм реґулярнім відеовыступліню. На Кримі дошло вчера к експлозії на тамтешній російскій воєньскій базі Новофедорівка, припоминать DPA. Їх прічіна была спочатку неясна і влада в Києві ся к одповідности за них неприголосила. Денник  The New York Times шак інформував, же україньска армада атаковала на вызнамну російску летецьку базу нешпеціфікованов збройов. Російске міністерство обраны тырвало на тім, же выбухы небыли запрічінены острільованям. (TASR, Pkf)