Підпресидателька влады Словацькой републікы і міністерка інвестіцій, реґіоналного розвитку і інформатізації Вероніка Ремішова в понедільок в Бруселі підписала Партнерскый договор меджі Европсков комісійов і Словакійов на період років 2021 – 2027, котрый є стратеґічным планом на черьпаня еврофондів на тот період. Договор Ремішова підписала вєдно із еврокомісарьков про реґіоналный розвиток Елісов Ферреіровов і еврокомісарьом про робочі місця а соціалны права Ніколасом Шмітом. Ремішова уточнила, же з еврофондів на найблизшый сімрічный період Словакія здобуде майже 13 міліард евр. Єдночасно еврокомісарька Ферреірова звернула увагу, же то не є „закінченый процес“, бо екзекутіва Унії буде позорно слідовати і моніторовати імплементацію проґрамів, котры мають быти фінанцованы із сполочного европского бюджету.

(Медвідь, ТASR)